Qendra për Zhvillim Profesional në Universitetin e Tiranës njofton se, më 6 nëntor 2025, në orën 10:00,në Godinën “Liria”,do të zhvillohet
“ Programi i Formimit Pedagogjik-Psikologjik” i ofruar për:
-
personelin e ri akademik të punësuar rishtas që nuk zotërojnë formim pedagogjik-psikologjik nëpërmjet studimeve të kryera universitare,
-
për personelin akademik të kategorisë asistent lektor, por që nuk ka marrë formim pedagogjik nëpërmjet studimeve universitare apo trajnimeve gjatë karrierës.
-
Gjithashtu, ky program do të ofrohet edhe për personelin akademik në një institucion tjetër të arsimit të lartë, që është i interesuar të ndjekë këtë kurs, si dhe për këdo që aspiron të punësohet në një institucion të arsimit të lartë në një të ardhme.
Programi ofrohet nga Universiteti i Tiranës dhe do të udhëhiqet nga pedagogë me përvojë të gjerë në fushën e mësimdhënies, si dhe profesorë të huaj, të cilët do të ndajnë qasjet dhe eksperiencat e tyre profesionale.
Ky program synon të trajnojë personelin e ri akademik, pedagogët pa formim psiko-pedagogjik, si edhe doktorantët që aspirojnë një karrierë në arsimin e lartë.
Ai është i hapur edhe për pedagogët e institucioneve të tjera të arsimit të lartë të interesuar për ndjekjen e këtij formimi.
Programi do të zgjasë 12 javë dhe përfshin tre fusha kryesore:
-
Fushën e mësimdhënies,
-
Fushën e disiplinës mësimore,
-
Fushën e vlerave profesionale.
Trajnimi synon të pajisë pjesëmarrësit me kompetenca psiko-pedagogjike, duke përfshirë njohuri mbi sjelljen dhe motivimin e studentëve, stilet e të nxënit, metodat e mësimdhënies aktive, vlerësimin dhe përdorimin e teknologjisë në procesin mësimor.
Programi vlerëson rëndësinë e krijimit të mjediseve pozitive dhe gjithëpërfshirëse të të nxënit, ku studentët ndihen të respektuar dhe të angazhuar. Përmes metodave interaktive dhe përvojës praktike, synohet të forcohet aftësia e pedagogëve për të nxitur pjesëmarrjen, të menduarin kritik dhe motivimin e studentëve.
Në përfundim, ky program përfaqëson një hap të rëndësishëm në zhvillimin profesional të lektoreve të rinj, duke kontribuar në përmirësimin e cilësisë së mësimdhënies dhe në avancimin e arsimit të lartë në Shqipëri.