QENDRA PËR MËSIMDHËNIEN DHE TË NXËNIT NË ARSIMIN E LARTË

Në funksion të zbatimit të Politikës së Zhvillimit të Personelit Akademik, Universiteti i Tiranës ka ngritur një strukturë ndihmës-akademike me karakter akademik, në vartësi të Rektoratit, e cila emërtohet Qendra për Mësimdhënien dhe të Nxënit në Arsimin e Lartë (QMNAL). Veprimtaria e QMNAL-së zhvillohet në bashkëpunim me Departamentin e Pedagogjisë dhe Psikologjisë të Fakultetit të Shkencave Sociale; grupet mësimore dhe kërkimore të didaktikave lëndore të Fakultetit të Gjuhëve të Huaja, Fakultetit të Historisë dhe të Filologjisë, Fakultetit të Shkencave të Natyrës; pedagogë me përvojë të spikatur mësimdhënieje nga Fakulteti i Ekonomisë dhe Fakulteti i Drejtësisë; ekspertë të teknologjisë së informacionit dhe komunikimit të Universitetit të Tiranës; si dhe ekspertë të huaj, të angazhuar në bazë të kontratave të bashkëpunimit.

Vizioni, misioni dhe objektivat e QMNAL-së

Vizioni

Qendra për Mësimdhënien dhe të Nxënit në Arsimin e Lartë synon të bëhet një qendër ekselence në formimin dhe trajnimin pedagogjik të personelit akademik, jo vetëm për Universitetin e Tiranës, por edhe për institucionet e tjera të arsimit të lartë në Shqipëri, duke kontribuar në rritjen e cilësisë së mësimdhënies dhe të të nxënit në arsimin e lartë.

Misioni

Të ofrojë programe të formimit pedagogjik dhe të zhvillimit të vazhduar profesional për personelin akademik, që synojnë zhvillimin e kompetencave pedagogjike për një mësimdhënie cilësore dhe përmbushjen e standardeve profesionale të arsimit të lartë, si dhe programe për optimizimin e potencialit të të nxënit të studentëve.

Objektivat e QMNAL-së

Ndërtimi i QMNAL-së sipas praktikave më të mira ndërkombëtare

Ky objektiv është i përshtatur me vizionin dhe synon ngritjen e një strukture që nuk ekziston më parë në Shqipëri, duke përdorur modele ndërkombëtare si udhërrëfyes.

Ofrimi i programeve bashkëkohore të formimit dhe zhvillimit pedagogjik

Programet do të ndërtohen mbi vlerësimin e nevojave institucionale dhe kombëtare, si dhe rekomandimet ndërkombëtare, duke synuar formimin e kompetencave pedagogjike për mësimdhënie cilësore.

Mbështetja e të nxënit të studentëve

QMNAL do të asistojë studentët përmes trajnimeve dhe konsulencës pedagogjike, për t’i ndihmuar ata të mësojnë në mënyrë efektive dhe të përvetësojnë programin e studimit.

Përgatitja e materialeve teorike dhe praktike për formimin pedagogjik

Synon përgatitjen e materialeve për programet e formimit dhe zhvillimit profesional, krijimin e një biblioteke të pedagogjisë së arsimit të lartë, si dhe materiale multimediale (DVD).

Përgatitja e materialeve për mbështetjen e të nxënit të studentëve

Materialet ndihmëse do të ndihmojnë në ofrimin e shërbimeve dhe në përmirësimin e të nxënit të studentëve.

Zhvillimi i partneriteteve

Bashkëpunimi me ekspertët më të mirë brenda dhe jashtë vendit, si dhe zhvillimi i partneriteteve ndërkombëtare, do të mundësojë shkëmbimin e përvojave dhe përmirësimin e cilësisë së shërbimeve.

Fusha e veprimtarisë së QMNAL-së

QMNAL zhvillon veprimtari në fushën e pedagogjisë së arsimit të lartë dhe ofron këto programe dhe shërbime:

Programi i Formimit Pedagogjik të Personelit Akademik;

Programi i Zhvillimit të Vazhduar Profesional të Personelit Akademik;

Programi që mbështet të nxënit e studentëve;

Publikime për pedagogjinë e arsimit të lartë.

Aktivizimi i programeve do të kryhet në varësi të nevojave dhe mundësive financiare.

Programi i Formimit Pedagogjik të Personelit Akademik (PFPPA)

Ky program synon formimin pedagogjik të personelit akademik, për të përmbushur në mënyrë cilësore kompetencat e nevojshme për profesionin e pedagogut. Ai ofrohet nga QMNAL në dy forma:

Kurs i plotë i formimit pedagogjik

Për personelin e ri akademik që nuk ka formim pedagogjik universitar, për asistentë-lëktorët në detyrë pa formim pedagogjik, si dhe për këdo që është pedagog ose aspiron të punësohet në arsimin e lartë. Kursi përfshin tri fusha: mësimdhënien, disiplinën mësimore dhe vlerat profesionale. Pjesëmarrja në këtë kurs është e detyrueshme dhe në përfundim jepet certifikata e formimit pedagogjik.

Kurse të shkurtra për plotësim të formimit pedagogjik

Ofrohen sipas nevojave dhe përfshijnë module të veçanta nga kursi i plotë. Në përfundim jepet certifikata për plotësim të formimit pedagogjik.

Programi i Zhvillimit të Vazhduar Profesional të Personelit Akademik (PZHVPPA)

Ky program ofrohet për personelin akademik në detyrë, për të përditësuar dhe përmirësuar kompetencat pedagogjike gjatë karrierës. Ofron trajnime edhe për drejtuesit e njësive bazë dhe grupeve mësimore dhe kërkimore, për të mbështetur veprimtarinë menaxhuese dhe administrative.

Forma të ofrimit përfshijnë: kurse të shkurtra, ditë informimi, ditë zhvillimi profesional, vit sabatik, vizita studimore, pjesëmarrje në rrjete dhe shoqata profesionale. Metodat: workshop, webinar, seminare, konferenca, mentorim, etj.

Disa shembuj tematikash: risitë pedagogjike në arsimin e lartë, kërkimin shkencor, përdorimin e teknologjisë digjitale, menaxhimin e arsimit të lartë, dosjen e mësimdhënies etj.

Programi që mbështet të nxënit e studentëve

Ofron shërbime për studentët e Universitetit të Tiranës për të ndihmuar optimizimin e potencialit të tyre të të nxënit. Përfshin:

Kurse të shkurtra për të nxënit;

Konsulencë pedagogjike;

Trajnime për përgatitjen e punimeve të kursit, temave të diplomës, disertacionit;

Trajnime për përdorimin e teknologjisë mësimore, menaxhimin e kohës, aftësitë ekzekutive, përballimin e stresit gjatë provimeve, etj